Оңтүстік-Батыс мал және өсімдік шаруашылығы ғылыми-зерттеу институты ЖШС-нің «Қуаңшылыққа төзімді мал азықтық дақылдары» бөлімінің ғылыми қызметкерлері ауыл шаруашылығы ғылымдарының докторы А. Сеиткаримовтың қатысуымен Ғылыми-зерттеу жұмыстарының күнтізбелік жоспарына сәйкес Түркістан облысындағы Бақтыөлең тәжірибе алаңында фенологиялық бақылау жұмыстарын жүргізді.
Зерттеу барысында қуаңшылыққа төзімді мал азықтық дақылдар мен табиғи өсімдік түрлерінің өсуі мен дамуының негізгі кезеңдері, жергілікті қуаңшылық жағдайына бейімделу ерекшеліктері және жалпы өсімдік күйі бағаланды.
Атап айтқанда, изен, теріскен, кейреуік, шоған, жүзгін, сексеуіл және басқа да өсімдік түрлеріне фенологиялық бақылау жүргізілді.
Жүргізілген бақылаулар өсімдіктердің қуаң әрі қолайсыз климаттық жағдайларға бейімделу ерекшеліктерін анықтауға, олардың өсіп-жетілу динамикасын бағалауға және мал азықтық мақсатта тиімді пайдалану мүмкіндіктерін айқындауға бағытталған.Бұл зерттеулер өңірдің табиғи-климаттық жағдайына бейімделген, қуаңшылыққа төзімді мал азықтық өсімдіктерді ғылыми тұрғыдан бағалау және оларды ауыл шаруашылығы өндірісінде тиімді пайдалану үшін маңызды.
